Dnja 08. decembra wotmě so hodownička SJ Chrósćicy 1981 z.t. Bě to swjedźenske zarjadowanje, kotrež je wšitkich do praweje nalady za předstejace swjate dny sadźiło.

Wulka chwalba a dźak dźe Zahrodnikec pjekarni za słódnu pizzu. Runje tak chcemy Smolic bio-statokej swój dźak wuprajić, kotryž je nas ze słódnym swinjećom zastarał.

Hodownička njebě jenož składnosć, zhromadnje swjećić, ale tež rjana móžnosć, zhromadnosć našeho towarstwa skrućić. Bě rjenje widźeć, kak so čłonojo mjez sobu wuměnjachu a zhromadnje spomóžny čas dožiwichu.

Přewšo zrudźeni běchmy, jako docpě nas před něšto dnjemi powěsć, zo naš přećel Paul hižo mjez nami njeje. Wón njewobohaćeše našu sportowu jednotku Chrósćicy jenož ze swojimi mnohimi wrotami, ale wosebje tež z jeho wosebitym wašnjom. Z Paulom sy móhł wo wšěm rěčeć, so rady a husto zhromadnje smjeć. Z jeho wjesołosće, wotewrjenosće a pozitiwneje nahlady móžachmy jako mustwo wjele čerpać. Hižo w młodźinskich klasach wuzběhny so wón wot koparjow samsneje staroby jasnje a zamó ze swojej spěšnosću a techniku při bulu přihladowarjow zahorić. Tuž njezadźiwa, zo nošeše Paul hižo zahe trikot prěnjeho mustwa SJ Chrósćicy. Spěšnje sta so wón z krutym wobstatkom našeho cyłka – dźěl swójby SJC. Kaž tak husto w mustwowym sporće pak njedosaha jenož ryzy sportowy talent. Štož Paula wosebje wuzběhowaše bě jeho zapal, mjenujcy wojować hač do kónca, doniž njerěka „Raz, dwaj, tři – dobyli”. Z tutej motiwaciju poda so wón do kóždeje hry, wšojedne kak přećiwnik rěka. A runje to wučinješe jeho wuspěch, kotryž so w mnohich medaljach a pokalach zwurazni. Předewšěm na zdźerženju krajneje klasy našeho mustwa měješe wón wulki podźěl. Hač poražka, hač dobyće, zhromadnje přez wšě fazy kročić – to nas wšitkich zwjazowaše! Njedawno w hrě k stotemu jubilejej Sokoł Ralbicy-Hórkow běše wón prěni króć tež za Serbske mustwo nastupił. Wosobinsce wjeselach so, zo móžach nětko tež tu z mojim nadběhowanskim partnerom na trawniku stać.

Paul abo tež „Šnajdi“ abo „Space“, kaž jeho mnozy mjenowachu bě přeco sprawny, zdwórliwy a runje tak dobry připosłuchar, běše aktiwny a angažowany, předewšěm tež we Worklečan a Chróšćan młodźinskim klubje. Stajnje sy jeho z wulkej črjódu přećelow po boku widźał. W pomjatku wostanje nam jeho wosebite wašnje a wšě te rjane wokomiki, kotrež z nim zwjazamy. Wšěm swójbnym, přiwuznym a přećelam wuprajamy w měnje towarstwa SJ Chrósćicy naše hłuboke sobužarowanje.

Bóh tón Knjez njech da ći wěčny wotpočink a wěčne swětło njech ći swěći. Wotpočuj w pokoju.

Nosymy će na wšě časy w našich wutrobach, Paulo!