Wutrobnje witajće na našej stronje

Zestawa SJC: Škoda, L. Zahrodnik, Dźisławk, Zynda, Wornar (63. F. Bjeńš), Cyž, G. Zahrodnik, Bogusz (88. M. Zahrodnik), Rätze, Hawš, Młynk

Minjenju njedźelu wotmě so nachwatanska hra mjez prěnjomaj mustwomaj z Rakec a Chrósćic. Nastupiłoj běštej mustwje wjedra dla nic w Rakecach, ale na kumštnym trawniku w Kamjencu. Na łopjenje běchu Rakečenjo jasny faworit, wšako běchu so z pjatym městnom do zymskeje přestawki podali, mustwo SJC na dwanatym. Chróšćenjo pak mějachu lěpši start do partije. Z dobrymi kombinacijemi móžachu přećiwnika hižo zahe pod čisć stajeć. Jednu tajku kombinaciju po lěwej stronje wuži Lucian Zahrodnik. W pjatej mjeńšinje překwapi wón wrotarja Toma Köhlera z jeho sylnej třělwu z distancy. Koparjo SJC so nad spěšnym nawjedowanjom wotpowědnje wjeselachu. Krótko na to skoro zaso juskachu, jako dótknje bul Gabriela Zahrodnika po wólnym kopje žerdź. Najebać někotrych dalšich dobrych móžnosćow w zažnej fazy hry, pak so skerje dale a dale defensiwnje orientowachu. Nětko běchu Rakečenjo ći, kotřiž hru dominowachu. Wosebje přez spěšne kontery a kombinacije w srjedźnym polu spytachu so wrotam Chrósćenjow bližić. Naposledk pak so radźi defensiwje SJC akcije přećiwnika wotwobarać. Zdobom spytachu tež Chróšćenjo někotre ofensiwnje akcenty sadźić, tola husto hdy njewuwichu so strašniše móžnosće, wosebje njekoncentrowanosćow při bulu dla. Tola přiwšěm radźi so hosćom nawjedowanje hač k přestawce zakitować.

Po změnje stronow běše wobraz podobny, kaž we wjetšim dźělu prěnjeje połojcy. W 52. Mjeńšinje pak wuwojowachu sej Chróšćenjo róžk. Při tutym padny bul Jonasej Zyndźe před noze a tutón kulu z powětra do praweho kuta přećiwnika zaměstni. Běchu to znowa, kaž hižo pola Zahrodnika wuběrne wrota a tak SJC swoje nawjedowanje zdobom na 0:2 wutwari. Rakečenjo spytachu pak tutón wotstawk skrótšić a měrjachu so přeco zaso strašnje Chróšćanskim wrotam. Na druhej stronje pak mějachu samo koparjo SJC móžnosć byli kontery konsekwentnišo wuhrali, na 0:3 zwyšić. Tola w 70. mjeńšinje potom Rakečanski SV prěni króć juska. Calvin Krahl wotzamkny z něhdźe 15 metrow do lěweho kuta. To mustwo Enrica Angermanna wězo mobilizowaše. Tak hižo šěsć mjeńšin pozdźišo Lukas Kaltschmidt staw na 2:2 wuruna. Po flance z praweje strony steješe wón na prawym městnje a direktnje wotzamkny. W tutej fazy Chróšćenjo so jenož hišće zrědka wrotam přećiwnika bližachu, skerje so nětko na wobchowanje stawa koncentrowachu. W nimale poslednjej akciji hry, třěli ofensiwny hrajer Rakečanskeho SV bul wysoko na wrota SJC, tola zakitowarjej Michałej Młynkej radźi so w poslednim wokomiku hišće bul z hłowu wotwobarać. Krótko na to sudnik fulminantnu hru wothwizda. Wězo je škoda, zo njemóžachu koparjo SJC nawjedowanje do dobyća přeměnić, na druhim boku pak přećiwnik tohorunja dosć dobrych akcijow měł a na kóncu samo na 3:2 zwyšić. W cyłkownym pak je kónčny staw 2:2 fairny remis.

J. Bogusz

SJ Chrósćicy – ST Hnašecy /­ Dobruša

Zestawa SJC: M. Cyž – Zynda (85. Mark), F. Cyž, Młynk, Dźisławk, L. Zahrodnik, Hawš, G. Zahrodnik, Graf (60. Bjeńš), Wornar (60. Šiman) Bogusz (85. Rätze)

Njedźelu běše z Hnašecami /­ Dobrušu znowa mustwo z načolnej skupiny z hosćom w Chrósćicach. Tuta hra njebě prěnja mjez cyłkomaj, wšako běchu hosćo z jasnym dobyćom SJC z pokala wrjesli. Tuž mějachu Chróšćenjo hišće něšto wotewrjene z hosćemi.
Hnašečenjo lěpje do hry startowachu a spytachu přeco zaso jich top-nadběhowarja Lucasa Mörl do hry zawjazać. Tak sej tež prěnju móžnosć wuhrachu. Třělwu Mörla pak Matej Cyž, kiž Jakuba Škodu zastupowaše wotwobara. Po tym so hra často mjez šěsnatkomaj wothra. Po 21. min dóstachu hosćo wólny kop z něhdźe 30 metrow před wrotami. Lucas Mörl sej bul połoži a jón direktnje do hornjeho lěweho kuta smoknje. Tuž dóstachu hosćo z krasnej třělwu nawjedowanje. Tola tute wrota běchu za domjacych pohon wjace za hru činić. Po rjanej kombinaciji na prawym křidle so Lucian Zahrodnik do šěsnatki předrě. Jeho flanka docpě Jana Bogusza, kotrehož třělwa z krótkeje distancy puć nimo wrotarja njenamaka. Tež w dalšej akciji běchu Chróšćenjo wurunanju blisko. Dołhi bul za škita docpě L. Zahrodnika. Jeho třělwa pak prasnje wot pobóčnej žerdźe zaso do hrajnišća. Na druhej stronje škit SJC derje steješe a strašne situacije zakitowaše. Tuž dźěchu Chróšćenjo z snadnym zastawkom do połčasa.

Spočatka druheho połčasa bě wurunany. Wobaj cyłkaj łakachu na zmylk druheho. Hra njeskićeše mnoho móžnosćow. Ale za to mnoho dwubojow, kotrež so husto fairne wotměchu. Tu měješe sudnik tójšto zadźěła, kotryž na kóncu samo 11 króć žołtu kartu hrajerjam pokaza. Poslednju běrtl hodźinu dyrbjachu Hnašečenjo po žołto-čerwjenej z mužom měnjenje absolwować. Tu widźachu domjaci jich šansu. W hač do kónca napjatej a dobrej hrě SJC na wrota Hnašecam tłóčachu. Tola hinak hač na kóncu prěnjeho połčasa sej Chróšćenjo woprawdźe jasnu móžnosć hižo njewuhrachu. Tohodla sudnik k snadnej poražce za SJC hru wothwizda.
Wurunanu hru rozsudźi krasny wólny kop. Škoda za SJC wšako mějachu wosebje w prěnim połčasu móžnosć hru wurunać.
Přichodny tydźeń nastupja Chróšćenjo pola postupnika z Hlinowca. Hra budźe so w Halštrowje wotměć.

Maksimilian Kral- Zahrodnik

DJK Módro - Běli Kulow – SJ Chrósćicy 0:1 (0:1)

Zestawa Kulow: Franz – Hantschke (67. Kowalick), Lange, Korch, Katzer, Koplanski (90. Woko), Kisch (55. Bulang), Wehlan, Wittek, Nicolaides, Bergmann
Zestawa SJC: Škoda – Zynda, F. Cyž, Młynk, Dźisławk, L. Zahrodnik (63. Graf), Hawš, G. Zahrodnik, Bogusz (88. Mark), Kral-Zahrodnik (9. Handrik (81. Rätze), Šiman (68. Wornar)

Sobotu wotmě so w Kulowje derby mjez domjacymi Módro – Běłemi a Chróšćanami. Kulowčenjo móžachu zašłe dwě hrě za sebje rozsudźić a staja tež w tabulce před hosćimi. Tući čakaja hižo wot štwórteho hrajneho dnja na dobyće.
Při optimalnych nazymskich wuměnjenjach sudnik hru zahwizda. Po něšto časa zazběha sej Chróšćenjo prěnje móžnosće wuhrachu. Hnydom trójce steješe tu Jan Bogusz w srjedźišću. Po kombinaciji Luciana Zahrodnika a Filipa Šimana dósta Bogusz bul w šěsnatce. Jeho třělwa z krótkeje distancy pak wrota snadne misny. W přichodnej akciji wotwobara Kulowski wrotar Lucas Franz wólny kop Gabriela Zahrodnika a před nohi Chróšćan nadběhowar. Tutón móžnosć Bogusz wužije, tola pobóčny sudnik na nimohru rozsudźi. Třeća móžnosć pak přinjese skónčnje nawjedowanje za SJC. Po přihrawce Clemensa Handrika běžeše Bogusz samy na wrotarja a bul k zasłuženym 1:0 we wrotach zaměstni (36.). Tute wrota běchu signal za Kulowčanow. Woni spytachu so přeco zaso přez křidła předrěć a sej móžnosće wuhrać. Tola škit SJC wokoło Feliksa Cyža wěšće steješe.

Druhi połčas nawjaza na kóncu prěnjeho. Kulowčenjo wjace do hry inwestowachu, tola w škiće hosći lědma městna namakachu. Tež Chróšćenjo njemóžachu hač do srjedź druheho połčasa wulce strach před wrotami wubudźić. Tuž přihladowarjo jenož mało wrotowych situacijow widźachu. Zaměnjeni hrajerjo SJC přinjesechu hišće raz nowy wětřik do hry. Tak mějachu Chróšćenjo móžnosć hru dočasnje rozsudźić. Tola Alwin Graf zwrěšći po konteru přez lěwu stronu na wrotarju. Tež distancowu třělwu Bena Rätze wrotar wujasni. Tak zwosta hra hač do kónca napjata. Kulowčenjo spytachu w poslednich mjeńšinach hru hišće wurunać. Tola přećiwo derje stejacym škiće na tutym dnju ničo napřećiwić njemějachu. Tak sudnik fairny a hač do kónca napjaty derby k dobyću SJC wothwizda.
Skónčnje móžachu Chróšćenjo zaso raz dobyć. Derje stejacy škit bě na tutym dnju wažny faktor za tři dypki. Tu chcedźa přichodny tydźeń dale pokročować hdyž su koparjo z Hnašecy - Dobruše z hosćom.

Maksimilian Kral-Zahrodnik

SJ Chrósćicy – Post Germanija Budyšin 2:3 (1:1)

Zestawa SJC: Škoda – Mark, Dźisławk, F. Cyž, Rätze, L. Zahrodnik, Hawš, G. Zahrodnik, Bogusz, Kral – Zahrodnik, Šiman (60. C. Handrik)

Na kermušnej njedźeli běše Post Germanija z Budyšina z hosćom w Chrósćicach. Hosćo su znowa přećiwnik z načolnej skupiny tabulki.
Nazymske wjedro z dešćom a sylnym wětřik akteram na hrajnišću ćežke wuměnjenja skićeše. Přiwšěm wobaj cyłkaj tute na hłubokim trawniku přiwzaštaj. Chróšćenjo mějachu prěnje móžnosće hry a docpěchu tež nawjedowanje. Po dołhej přihrawce wotpołoži Filip Šiman bul Oskarej Hawšej, kotryž hrajny nastroj z 25 metrow wyše wrotarja do saka smokny. (16.). Nawjedowanje pak dołho njesteješe. W 24. min rozsudźi sudnik na jědnatku po tym, zo bě bul z ruku hraty. Tutón hosćo přez Niklas Schramma wužichu a hru zaso wurunachu. Hra bě charakterizowana wot z mnoho dwubojemi. Móžnosć běchu na wobojich stronach rědke. Na stronje SJC měješe Šiman hišće šansu. Tola jeho třělwa z wótreho kuta wrota misny. Budyšenjo mějachu hišće dobru móžnosć po wólny kopje. Třělwu z 20 metrow pak Jakub Škoda na łatu wotwobara.

Tež w druhim połčasu bě hra wurunana. Jasne móžnosće tuž najprjedy na žanej stronje njeběchu. Po hratej hodźinje docpěchu hosćo nawjedowanje. Po konteru přez prawe křidło sadźi Patrick Hoppe bul z hłójčku k 1:2 do wrotow. (65.). Chróšćenjo tłóčachu w slědowacych mjeńšinach na wrota Post Germanije. Tola třělwy Luciana Zahrodnika abo Jana Bogusza njenamakachu puć do wrotow. Po njezbožownje akciji po róžku hosćow padnjechu 1:3 přez samowrota SJC (83.). Ručež zastawka pak domjaci dale wojowachu. W 85 min. rozsudźi sudnik po foulu na jědnatku za SJC. Slědowacy pokutny kop Gabriela Zahrodnika wrota do prědka wotwobara. Tež w druhim pospyće wón bul kruće dźerži. W podlěšenskim času Chróšćenjo zastawk skrótšichu. Wólny kop před šěsnatki G. Zahrodnik direktnje do hornjeho kuta k 2:3 sadźi(90.). Domjaci spytachu hru w poslednich mjeńšinach hišće wurunać. Dalše wrota pak so jim njeporadźichu.
Po wulkim boju steja Chróšćenjo znowa bjez dypkow w ruce. Z jědnaće ličakami zaměstnja so tučasnje na dźesatym městnje tabulki.
Přichodnu sobotu maja koparjo SJC wonkownu hru přećiwo Kulowej.

Maksimilian Kral – Zahrodnik

SJ Großnaundorf – SJ Chrósćicy 3:1 (2:0)

Zestawa SJC: Škoda – Dźisławk, F. Cyž (88. Mark), Młynk, Zynda, L. Zahrodnik, G. Zahrodnik (81. Šiman), Kral – Zahrodnik (81. Wornar), Hawš, Bogusz (64. Graf), C. Handrik (64. Rätze)

Njedźelu běchu Chróšćenjo z hosćom w Großnaundorfje. Tamniša sportowa jednotka tučasnje tabulku we wokrjesnej wyšej lize nawjeduje. Tuž čakaše na SJC ćežki nadawk.
Hra so za SJC špatnje započa. Po wólnym kopje podlěši Lukas Menzel z hłójčku bul a docpě hižo w 8. min nawjedowanje za domjacych. Tola Chróšćenjo njedachu so wot zastawka wottrašić. Přiwšěm sej wobaj cyłkaj na hłubokim trawniku z hry jenož mało móžnosćow wuhrachu. Mnoho so mjez šěsnatkomaj wothra. Hosćo namakachu přeco zaso městno na lěwym křidle. Tola škit Großnaundorfa nadběhi přeco zaso naposledk derje zakitowaše. Na druhej stronje pokazachu domjaci swoje sylnosće přez standarty. Wšojednje hač wólne kopy, róžki abo zamjety, tute běchu stajnje strašne. Po poł hodźinje Chróšćenjo nimale wurunachu. Wólny kop Gabriela Zahrodnika pak prasnje jenož na łatu. W přichodnje akciji domjaci jich druhe wrota třělichu. Po dołhim zamjeće nadběhowar bul podlěši a Nico Söhnel kulowatu kožu z krótkeje distancy přez liniju stłóči (36.). Do połčasa měješe SJC hišće raz dwójnu šansu. Po flance z lěweje strony wrotar třělwu Jana Bogusza wujasni. Tež druhi pospyt Clemensa Handrika z kromy šěsnatki wrotar wotwobara.

Po połčasu spytachu Chróšćenjo zastawk skrótšić. Škit domjacych pak derje steješe. Přiwšěm přińdźe Jonas Zynda po wólnym kopje k třělwje. Tola wrotar ju znowa wujasni, kaž tež třělwu Oskara Hawša někotre mjeńšiny pozdźišo. Tak kaž hižo prěnjej wróćće nastachu tež třeće přez standart. Po róžku so Menzel w powětře přesadźi a w 68. min 3:0 docpě. Krótko do wothwizdanja posła Franciskus Wornar Filipa Šimana na prawym křidle. Jeho flanku móžeše zakitowar jenož hišće do swojich wrotow wotwobarać. Sudnik hru krótko po tym wothwizda.
Suk so pola Chróšćanow dale njetorhnje. Ručež pokazachu přez wulke dźěle hry načolnikej paroli, rozsudźi na tutym dnju sylne standarty domjacych hru.

Na přichodnej kermušnej njedźeli wočakuja Chróšćenjo na domjacym trawniku koparjow Post Germanije Budyšina.

Maksimilian Kral - Zahrodnik

SJ Chrósćicy – TSV Połčnicy 2:2 (2:0)

Zestawa SJC: Škoda – Rätze (53. Mark), Dźisławk, Młynk, Zynda, Bjeńš (63. L. Zahrodnik), Hawš, G. Zahrodbik, Bogusz, Šiman (53. Kral-Zahrodnik)

Prěnju njedźelu winowca witachu Chróšćenjo koparjow z Połčnicy. Runja zašłemu tydźenju bě znowa mustwo, kotrež skerje deleka w hrajnej tabulce steji, přećiwnik Chróšćanow. Cyłk SJC chcyše po pózdnim wurunanju zašłeje hry najlěpje połnje dypkować a tak swoje městno w hornim dźělu hrajneje tabulki wobchować. Tola nažel so stawizna wospjetowaše. Spočatnje hraještej cyłkaj hłownje mjez šěsnatkomaj. Škitarjo na woběmaj bokomaj derje stejachu. Tak wrotarjej ničo za dźěło njeměještaj. Po nimale poł hodźinje pak docpě domjace mustwo wrota. Po róžku njemóžachu Połčničenjo bul wujasnić a Jonas Zynda smokny jón na 1:0 do wrotow (28.). Nětko hosćićeljohru skerje dominowachu a sej někotre móžnosće wuhrachu. Tak přesadźi so Franc Bjeńš derje přez prawe křidło a flankowaše nisko do šěsnatki. Tam steješe Jan Bogusz na prawym městnje a kulowatu kožu z krótkeje distancy na 2:0 do klětki suny. Tak podachu so Chróšćenjo z dobrym rezultatom do přestawki. Start po přestawce pak zaspachu. Hosćo so hnydom dwójce za sobu na wrota měrjachu. Prěni třěl Jakub Škoda z nohu wotwobara, druhi wuži Simon Stirl a w 48. min. zastatk skrótši. Chróšćenjo spytachu po tym zaso hru kontrolować. Tola wuwi so wotewrjena a intensiwna partija. Wobaj cyłkaj sej wjacore dobre móžnosće wuhraštej. Škoda dźeržeše nawjedowanje za swoje mustwo dołho. Porno tomu skićachu so Chróšćanam na druhej stronje někotre dobre móžnosće za konterowanje. Tola tute njewužichu a z tym hru dočasnje za sebje njerozsudźichu. Hosćo w poslednich mjeńšinach hišće raz ćišć zwyšichu a tak so stawizna wospjetowaše. W podlěšenskim času docpěchu hosćo z pomocu Cedrica Horche 2:2 (90.+2.). Domjacy cyłk spytaše w poslednich mjeńšinach hišće wrota třělić, ale tute so jim hižo njeporadźi. Po dobrym prěnim połčasu njemóžachu Chróšćenjo znowa nawjedowanje dlěši čas dźeržeć. Tuž wopušćichu hrajnišćo zaso raz jenož z jednym ličakom. Přichodny tydźeń nastupi SJC we wubědźowanju wo pokal doma přećiwo Hnašecam/­Dobruši.

Maksimilian Kral-Zahrodnik

SJ Chrósćicy – Horni kraj /­ Sprjewja 3:3 (1:1)

Zestawa SJC: Škoda – Graf (65. S. Handrik), Młynk, F. Cyž, Zynda, Bogusz (75. C. Handrik), Hawš, G. Zahrodnik, Bjeńš, Šiman (92. Rätze), Kral – Zahrodnik

Njedźelu běchu w Chrósćicach koparjo Hornjeho kraja/­Sprewje z hosćom. Z startowaše za SJC serija domjacych hrow, wšako maja tři domjacych hrow zasobu. Hosćo móžachu dotal hakle jónu dypkować a su w pincy tabulki. Chróšćenjo chcychu po słabym wukonje we Wulkich Rědorjecach zaso hinajše mjezwočo pokazać. To woni tež wot spočatka na trawniku pokazachu. Hižo w prěnich pjatnaće mjeńšinach mějachu domjaci móžnosće za wjacore wrota. Z prěnjej akciju bě so Franc Bjeńš w šěsnatce přesadźił, tola třělwa prasnje na łatu. W dalšej situaciji dźerži wrotar třělwu Bjeńša. Tež třělwa Oskara Hawša z distancy njenamaka puć do wrotow, ale prasnje wot žerdźe za wrota. Tu a w dalšich akcijach falowaše Chróšćanam wot spočatnej fazy jenož mało k prěnim wrotam, na druhej stronje docpěchu hosćo z nimale prěnjej móžnosću nawjedowanje. W 24. min. smokny Paul Grohmann wólny kop z něhdźe 20 metrow direktnje do wrotow. Jenož někotre mjeńšiny na to rozsudźi sudnik na jědnatku a hosću hru nimale kompletnje na hłowu stajichu. Tola centralnu třělwu Jakub Škoda z nohu wotwobara a z tym swoju mustwo w hrě dźeržeše. Krótko do połčasa móžachu domjaci hru wurunać. Po róžk Gabriela Zahrodnika Michał Młynk bul z krótkeje distancy do wrotow suny a rezultat na 1:1 staji. (43.).

Po połčasu bě hra wotewrjena a wobaj cyłkaj měještaj swoje móžnosće. Přiwšěm běchu hosćo nawjedowanju bliši. Škoda tu a tamnu třělwu derje wujasni. W 74. min móžachu Chróšćenjo znowa wyskać. Bjeńš so na lěwym křidle přesadźi a před wrota flankowaše, hdźež Bogusz bul do klětki k 2:1 suny. Hosćo po tym hišće raz tempo zwyšichu a w 87. min 2:2 přez Constantina Pabsta docpěchu. Tola w furioznej fazy SJC hnydom po tym hru zaso na swoju stronu sćahny. Po zakopje bu Bjeńš w šěsnatce foulowany a Młynk přetwori jědnatku k 3:2 (88.). Tola čuwy Chróšćanow dyrbjachu so na tutym dnju hišće dale napinać. W dołhim podlěšenskim času wužichu hosćo jich poslednju móžnosć a hru w 95. min. hišće raz wurunachu. Sudnik hru po tym hižo znowa njezahwizda.

Tak hromadźachu Chróšćenjo jenož jedyn ličak a přehrachu z poslednjej akciju dwaj dalšej. Ručež domjaci derje do hry startowachu, njemóžachu zažne wrota třěli a zhubichu po nawjedowanju hosći nitku hry. Přiwšěm docpěchu dwójne nawjedowanje, ale njemóžachu tute přez čas přinjesć. Tuž na kóncu bolostnje dypkaj zhubichu.

Přichodny tydźeń wotmě so dalša domjaca hra přećiwo Połčnicam.

Maksimilian Kral - Zahrodnik

Dorostowe dźěło SJ Chrósćicy njesteji jenož za wjeselo nad kopańcu, ale tež za zhromadnosć a angažement. Ćim bóle nas zwjesela, zo móžachu hnydom dwě našej młodźinskej mustwje z nowymi trikotami wuhotować.

Naša F2-Młodźina zaběži wotnětka w nowym outfiće. Zmóžniła je to firma Taxi a Bus Robel z Chrósćic, kotraž je jako sponsor nowe trikoty financowała.
Tež młodźina C smě so nad nowej trikotowej sadźbu wjeselić. Za to dźakujemy so wutrobnje pola Měrćinkec swójby z Baćonja, kotraž je nakup zmóžniła.

SJ Chrósćicy dźakuje so cyle wutrobnje woběmaj sponsoromaj za wulkomyslnu podpěru našeho młodźinskeho dźěła. Tajke přinoški rozsudnje k tomu přinošuja, zo maja naše dźěći a młodostni optimalne wuměnjenja za swoje sportowe wuwiće.

SC Großröhrsdorf – SJ Chrósćicy 4:1 (2:1)

Zestawa SJC: Škoda – Graf, F. Cyž, Młynk, Zynda, L. Zahrodnik, Hawš, Kral-Zahrodnik, Bjeńš, C. Handrik (60. Šiman), Bogusz (60. G. Zahrodnik)

Sobotu podachu so Chróšćenjo na dypkowu hru do Großröhrsdorfa. Po dobrym starće do hrajneje doby chcychu koparjo SJC dale dypkować a so z tym w hornim dźělu tabulki pozicioněrować.

Po zahwizdanju hry přez serbskeho sudnika Andreja Strelowa so hra za domjacych koparjow derje započa. Po tym, zo njemóžachu Chróšćenjo akciju w šěsnatce porjadne wujasnić, bu třělwa Sörena Pilza z krótkeje distancy wotfalšowana a padnje k 1:0 do wrotow (7.). Tola wotmołwa SJC dołho na so nječaka. Po róžku flankowaše Alwin Graf wujasnjeny bul po róžku znowa do šěsnatki a Jan Bogusz hłójčkowaše kulowatu kožu k wurunanju w 11. min do klětki. Hra bě po tym wurunana. Chróšćenjo spytachu kontrolu nad hru přewzać. Tu pak přewjele zmylkow činjachu. Domjaci agěrowachu z wěstej defensiwy a spytachu sej přez spěšne nadběhi móžnosće wuhrać. Tute pak škit SJC wuajsni. Na druhej stronje so SJC w ofensiwje jenož mało na tutym dnju poradźi. Krótko do połčas rozsudźi sudnik po foulu w šěsnatce na jědnatku. Tutón přetwori Pilz a staji rezultat na 2:1 (36.). Před połčasom měješe Franc Bjeńš hišće móžnosć hru znowa wurunać. Tola wrotar domjacych třělwu wujasni.

W druhim połčasu tež wjele na hrě njezměni. Chróšćenjo njenamakachu puć přez derje stejacy škit a domjaci běchu efektiwni před wrotami. W 55 min. docpě Jonas Steglich po třělwje w šěsnatce 3:1. Wurjadny hrajer domjacych na tutym dnju, Sören Pilz, třěli krótko na to po konteru swoje třeće wrota a staji z tym na 4:1 (63.). Chróšćenjo mějachu po tym hišće swoje móžnosće tak, zo bychu móhli w hrě hišće napjatosć natwarić. Tak zapasnje Graf wrota snadnje, po tym zo bě so derje w šěsnatce přesadźić. Dalša třělwa Michała Młynka do róžku wrota snadnje misny. Tuž zwosta na kóncu jasna a zasłužena poražka za SJC w Größröhrsdorje.

Chróšćenjo njemóžachu na tutym dnju na wukonach zašłych tydźenjow nawjazać a jich sylnosće na hrajnišću pokazać. To chcedźa přichodny tydźeń na kóždy pad polěpšić, hdyž nastupja na domjacym trawniku přećiwo Hornjemu krajej /­ Sprjewja.

Maksimilian Kral- Zahrodnik

KT Ottendorf II - SJ Chrósćicy 0:3 (0:1)

Zestawa SJC: Škoda – Graf (85. F. Cyž), Młynk, Zynda, Mark, L. Zahrodnik, Hawš, Wornar, Bjeńš, Šiman, Kral-Zahrodnik (72. Donat)

Druhe pokalne koło wuhrachu Chróšćenjo sobotu w Ottendorfje. Před třomi tydźenjemi nastupichu tam přećiwo prěnjemu mustwje. Tónkróć wojowachu přećiwo rezerwje wo zastup do přichodneho koła. Na papjery běchu role jasne, wšako domjaci dwě klasy niže hraja. To spytachu Chróšćenjo tež wot spočatka na kumštnym trawniku pokazać a docpěchu spěšne nawjedowanje. Wólny kop Oskara Hawša z centralnej pozicije móžeše wrotar jenož doprědka wotwobarać a Maksimilian Kral – Zahrodnik bul w druhim pospyće k 0:1 w 5 min. do wrotow suny. Tola po tym sej wobaj cyłkaj jenož zrědka strašne před wrotami pokazachu. Hra so husto mjez šěsnatkomaj wothraše a bu wot mnoho foulow přetorhnjena. Chróšćenjo mějachu hišće někotre pospyty, tola woprawdźity ćišć na druhe wrota njewukonjachu. Tež na druhej stronje sej domjacy cyłk ćežko w ofensiwje činješe a sej tohorunja mało naspomjećahódnych situacijow wuhra.
Do druheho połčasa startowaše SJC hnydom z dobrej móžnosću. Lucian Zahrodnik třěli z druheho rynka na wrota. Tola wrotar bul z dobrej paradu wotwobara. Po róžku pak docpěchu Chróšćenjo druhe wrota. Flanku Franciskusa Wornarja Klemens Mark do wrotow k 0:2 hłójčkowaše (65.). Jenož mjeńšinu pozdźišo bě hra z trěćemi wrotami SJC rozsudźena. Hawš sej bul krótko do šěsnatki wuwojowa a jón nisko k 0:3 do wrotow smokny (66.). Tež po tym mějachu Chróšćenjo hišće někotre móžnosće, kotrež pak k dalšim wrotam njewužichu. Tak suwereny sudnik hru z jasnym 0:3 za SJC wothwizda.
Chróšćenjo jich winowatostny nadawk spjelnichu a bjez wulkich problemow do přichodneho koła wokrjesneho pokala zaćahnychu. Tute budźe so na 12. abo 13.10 wuhrać. Njedźelu nastupi SJC doma přećiwo Wachauwje.

Maksimilian Kral – Zahrodnik

LSV Hory – SJ Chrósćicy 2:7 (0:1)

Zestawa SJC: Škoda – Graf (65. Mark), F. Cyž, Dźisławk, Zynda, L. Zahrodnik, Hawš, Kral-Zahrodnik (76. Wornar), Šiman (76. Matik), Beńš (80. B. Donat), Bogusz (80. Młynk)

K njewšědnemu časej (10:30) za Chróšćanow zahwizda sudnik njedźelu hru přećiwo Horam. Koparjo z wjeski blisko Wojerec běchu zašłu sezonu suwerenje postupili a z dwěmaj dobyćomaj wuspěšnje do noweje startowali. Chróšćenjo chcychu po hórkej poražce w derbyju reakciju pokazać a to bě hnydom wot spočatka widźeć.
Po pjeć mjeńšinach sej prěnju dobru móžnosć wuhrachu. Po flance z praweje strony smokny Franc Beńš bul na łatu wrotow. W přichodnej akciji pósła Filip Šiman Luciana Zahrodnika. Tola wrotar domjacych, Hubertus Čórlich, kiž bě tež někotre razy za Serbsku wubranku we wrotach stał, akciju wujasni. Chróšćenjo dale na wrota tłóčachu a přez jědnatku po foulu na Boguszu dalšu móžnosć dóstachu. Tutón Oskar Hawš w 17. min wužije a bul k 0:1 do wrotow třěli. Wot domjacych njebě w prěnim połčasu wjele naspomnjećahódneho widźeć. Jeničkej strašnej móžnosći mějachu po standartach, kotrež pak hosćo wujasnichu. W poslednjej akciji prěnjeho połčasa pruwowaše Beńš hišće raz wrotarja domjacych, kotryž bul wotwobara. Jenički manko w dobrym prěnim połčasu za SJC bě, zo hakle jedne wrota docpěchu.

Koparjo z Hory lěpje do druheho połčasa startowachu. Najprjedy pokaza Jakub Škoda swoju klasu jako třělwu z krótkeje distancy wotwobara. Po tym prasnje třělwa z krótkeje distancy na łatu. Tola tež Chróšćenjo mějachu móžnosće. Po niskej flance L. Zahrodnika suny Bogusz bul z krótkeje distancy do wrotow. Tola pobóčny sudnik rozsudźi na nimohru. W přichodnej akciji pak Bogusz swoje wrota docpě a na wrotach bohatu fazu hry zahaji. Znowa so hosćo přez prawe křidło přesadźichu. Třělwu Šimana Bogusz před wrotarjom wotpopadny a bul do klětki k 2:0 suny (60.). Z ničeho domjaci hru w běhu sydom mjeńšin wurunachu. Wólny kop Stefana Koarka bu wotfalšowany a zleći k 1:2 do wrotow (62.). W 69. min smokny Pascal Maurice Hering rjanu třělwu z 30 metrow wyše wrotarja do wrotow a docpě z tym 2:2. Reakcija SJC pak dołho njewuwosta: L. Zahrodnik dósta bul krótko za srjedźnej liniju a zběhny jón wyše škitarjow. Bogusz bul přiwza a jón wyše wrotarja k 2:3 do wrotow (71.) zběhny. Jenož dwě mjeńšinje pozdźišo so Beńš na lěwym křidle do šěsnatki předrě a před wrotarjom na Bogusza wotpołoži, kiž swoje třeće wrota dnja docpě. Hnydom po zakopje sej Hawš bul při srjedźnej liniji zdoby, samy na wrotarja běžeše a w 75. min rezultat na 2:5 staji. Tak Chróšćenjo w běhu pjeć mjeńšinow z třomi wrotami hru zaso na swoju stronu sćahnychu. W 82. min třěli runje zaměnjeny Bosćan Donat 2:6 po tym, zo bě so na prawym křidle do šěsnatki předrěł a bul nimo wrotarja do klětki sunył. Tež kónčny dypk hry sadźi Donat. Po kombinaciji na lěwym křidle posłužowa Damian Matik Donata, kiž bul k kónčnemu resultatej 2:7 do wrotow suny. Sudnik hru po tym wothwizda.

Chróšćenjo pokazachu dobru reakciju a hru jasnje za sebje rozsudźichu. Přichodny tydźeń nastupja SJC w druhim pokalnym kole přećiwo rezerwje Ottendorf-Okrilla.

Maksimilian Kral - Zahrodnik

SJ Chrósćicy – Sokoł Ralbicy /­ Hórki 1:3 (1:2)

Zestawa SJC: Škoda – F. Cyž, Dźisławk, Młynk (77. Graf), B. Cyž (30. Zynda), L. Zahrodnik, Hawš, Kral-Zahrodnik, B. Donat (46. Beńš), Šiman (53. C. Handrik), Bogusz
Zestawa Sokoł: Schöne – B. Heidorn, Matka (63. Janca), Rachela, Šewc (88. Šołta), Wałda, L. Heidorn (74. Mechela), A. Woko, Gloxyn, Hicka (68. T. Bejma), Šnajder (52. Korjenk)

Hrajny plan wokrjesneje wyše ligi měješe hnydom na druhim hrajnym dnju chłóšćenku za fanow serbskeje kopańcy spřihotowany – serbski derby mjez Chróšćanami a Ralbičanami. Tutón hru běchu sej w Chrósćicach 350 přihladowarjow wobhladali. Wobej hrě w zašłej sezonje skónčištej so bjez dobyćerja.

Ralbičenjo lěpje a z wjace ćišćom do hry startowachu. Po róžku Dennyja Gloxyna so Aleksander Wałda w šěsnatce přesadźi a bul hižo w štwórtej mjeńšinje do wrotow k zažnemu nawjedowanju hłójčkowaše. Tež po tym spytachu Delanscy koparjo jeju spěšneju nadběhowarjej Niklasa Šnaderja a Tima Hicku přeco zaso přez dołhe bule do sceny sadźić. Tak sej tež dalše, tež hdyž nic jasne móžnosće wuhrachu. Po něčim tež Chróšćenjo lěpje do hry namakachu. Prěnje móžnosće wrotar Ralbičanow wotwobara. Domjaci spytachu hru kontrolowachu, ale znowa wyskachu Ralbičenjo. Po konteru wotwobara wrotar SJC Jakub Škoda třělwu Hicki. Tola nadběhowar hosći bul w druhim pospyće do wrotow suny a rezultat na 0:2 w 25. min staji. Wuwije so intensiwna a bojowniska hra, hdźež měješe sudnik tójšto zadźěła. Na kóncu pokaza 9 króć žołtu kartu. Přiwšěm njebě derby njefairny. Hra wotmě so tym mjez šěsnatkomaj. Nichtó sej wjace dalše jasne móžnosće njewuhra. Krótko do połčasa pak Chróšćenjo skrótšichu. Wólny kop Oskara Hawša Jonas Zynda k 1:2 do wrotow třěli (45.).

Chróšćenjo spytachu w druhim połčasu ćišć powyšić. Tola škit Ralbičanow derje agěrowaše a domjacym jenož mało składnosćow skićeše. Přeco zaso falowaše SJC poslednja přihrawka abo Willi Schöne dwe wrotach Ralbičanow wurunanju zadźěła. Po rjanym dribblingu na lěwym křidle smokny Franc Beńš bul na wrota. Tola wrotar Schöne bul hišće z wuběrnej paradu na łatu podlěši a tež druhi pospyt Lucian Zahrodnik prasny jenož na pobóčnu žerdź. Tež w dalšej akciji Schöne wrotam zadźěła, jako po wólnu kopje a njejasnej situaciji bul wujasni. Runje w tutej napjatej fazy hrě, hdźež běchu Chróšćenjo wurunanju bliscy, pokazachu so Delanscy jako efektiwniši. Po wólny kopje Gloxyna reagowaše Fabian Korjenk najspěšnišo a posłuži Wałdu, kotryž bul z krótkeje distancy k 1:3 do wrotow suny a z tym swoje druhe wrota dnja docpěje (72.). Najebać rezultata spytachu Chróšćenjo w poslednich mjeńšinach z wrotami hišće raz napjatosć do hry přinjesć. Tute pak wjace njedocpěchu a tuž sudnik hru z 1:3 za Ralbicy wothwizda.

W dobrym, zajimawym a horcym serbskim derbyju so na kóncu te klewerniše a efektiwniše mustwo přesadźi. Chróšćenjo wosebje w druhim połčasu mnoho spytachu a tež někotre dobre móžnosće mějachu, ale tu falowaše snadź tež tróšku zboža před wrotami. Ralbičenjo pokazachu přez cyłu hru dobry mustwowy wukon a sej z tym tež dobyće zasłužichu.

Maksimilian Kral-Zahrodnik

KT Ottendorf - SJ Chrósćicy 2:3 (1:2)

Zestawa SJC: Škoda – F.Cyž, Młynk, Dźisławk, Mark, L. Zahrodnik (87. Matik), Hawš, Kral-Zahrodnik (83. Wornar), Graf (46. C. Handrik), Šiman (62. Beńš), Bogusz (79. Donat)

Po dobyću w prěnim pokalnym kole, startowachu Chróšćenjo sobotu w Ottendorfje do wokrjesnej wyšej lize. Na kumštnym trawniku běchu Chróšćenjo poslednju wonkownu hru zašłeje sezony hišće jasne přěhrali. To chcychu přećiwo nowo zestajenym, młodym cyłkej tónraz změnić, a pozitiwnje do hrajneje doby startować.

Domjaci lěpje do hry startowachu a z prěnjej móžnosću nimale nawjedowanje docpěchu. Tola třělwa prasnje na łatu. Krótko po tym pak padnje 1:0. Po zmylku běžeše Tom Gläser samy na Jakuba Škodu we wróćće SJC a třěli bul w 4. min do wrotow. Tež po tym sej domjaci lěpše móžnosće wuhrachu. Tu mějachu hosćo dwójce zbožo, zo padnje bul wot pobóčnej žerdźe zaso wróćo do pola. Chróšćenjo mějachu jich ćežu prawje do hry namakać. Tola z prěnjej móžnosću woni hru wurunachu. Wólny kop z lěwej strony Oskar Hawš wótrje před wrota flankowaše a nowopřichad Mato Dźisławk bul do wrotow hłójčkowaše (18.). Z přichodnej akciju SJC nimale nawjedowanje docpěchu. Filip Šiman posłuži w šěsnatce Jana Bogusza. Tola nadběhowar zwrěšći přećiwo wrotarjej domjacych. Hra bě po tym wurunana. Přiwšěm mějachu domjaci strašniše akcije před wrotami. Wosebje po zmylkach wuhrachu spěšne kontery. Na druhej móžachu Chróšćenjo nimale identiski standart krótko do połčasa k nawjedowanju wužić. Znowa přinjese Hawš kulowatu kožu strašnje do šěsnatki. Wrotar najprjedy flanku hišće wotwobara, tola Klemens Mark bul w druhim pospyće z krótkeje distancy přez liniju stłóči.

Tež do druheho połčasa startowachu koparjo z Ottendorfa z dobrej šansu. Znowa wuchowa Chróšćanow pobóčna žerdź před wrotami. Po tym pak mějachu hosćo dobru fazu. Přeco zaso mylachu domjacych derje při natwarje a móžachu sej někotre bule před šěsnatki domjacych zdobyć. Tak zdobudźe sej Lucian Zahrodnik kulowatu kožu před šěsnatki a posłuži Jana Bogusza, kotryž bul z krótkeje distancy k 1:3 do klětki suny (61.). Chróšćenjo zapasnjechu w tutej fazy hry štwórte třělić. Tuž łakachu domjaci na nich šansu a přeco zaso strašne nadběhi startowachu. Mnoho situacijow škit wokoło Michała Młynka wujasni. Tola w 91. min docpě Pepe Herrmann wrota za swoje barby a skrótši na 2:3. Tola sudnik hru krótko na zakónči a z tym so efektiwni Chróšćenjo z třomi dypkami na dompuć podachu.

Přichodnu njedźelu wočakuja Chróšćenjo Ralbičanow na wulki serbski derby na domjacym trawniku.

Maksimilian Kral-Zahrodnik

SJ Chrósćicy zesylnja so k nowej sezonje z dwěmaj nowopřichadomaj. Wot ST Radworja změni 19-lětny zakitowar Mato Dźisławk k SJC. Tohorunja nawróći so 25-lětny nadběhowar Philipp Šiman, kotryž hraješe naposledk pola DJK Sokoła Ralbicy/­ Hórki. Přejemy woběmaj wuspěšnu hrajnu dobu bjez zranjenja pola SJ Chrósćicy.

Česćeni čłonojo,
na přichodnu sobustawsku zhromadźiznu z wólbami předsydstwa SJ Chrósćicy 1981 z. t. přeprošuju Was
pjatk, 15. awgusta 2025, w 19:30 hodź. do wjacezaměroweje rumnosće „Jednoty“, Hórnikowa 34, 01920 Chrósćic.

Sćěhowacy dnjowy porjad je předwidźany:

TOP 1 lětna rozprawa 2024

1.1 Rozprawa jednaćela, financna a kasowa rozprawa pokładnika
1.2 pruwowanska rozprawa ke kónclětnemu wotličenju 2024‎

TOP 2 rozrěčenje k rozprawam
TOP 3 wolóženje předsydstwa za hospodarske lěto 2024
TOP 4 ćežišća dźěła 2024
TOP 5 wólby předsydstwa

5.1 wólba nawody zhromadźizny
5.2 wólba zapisowarja
5.3 předstajenje kandidatow
5.4 wólba předsydy
5.5 wólba městopředsydow
5.6 wólba pokładnika
5.7 wólba jednaćela

TOP 6 naprašowanja a zdźělenki (wšelake)

Za prašenja k tomu kontaktujće prošu jednaćela Rica Pohlinga pod telefonowym čisłom 0172 9855939.

Ze sportowym postrowom
Tadej Cyž
Předsyda