Wutrobnje witajće na našej stronje

SJ Chrósćicy – Módro - Běli Kulow 5:1 (2:0)

Zestawa SJC: Škoda – Mark (79. Cyž), Rätze, Kral-Zahrodnik, Matik, L. Zahrodnik (76. Wornar), Žur, Dźisławk (66. Zelnak), Hawš, Bogusz, G. Zahrodnik

Zestawa Kulowa: Franz – Kochta, Korch, Katzer (77. Zwahr), Koplanski, Kisch (46. Bulang), Wehlan, Kockert, Čorlich, Rettig, Kowalick (70. Semjank)

Na pjatym hrajnym dnju běchu koparjo z Kulowa hosć w Chrósćicach. Derby při dešćikojtym wjedrje běchu sej něhdźe 130 přihladowarjow wobhladali. Kulowčenjo běchu z štyrjomi dypkami do sezony startowali. Chróšćenjo chcychu po poražce zašły tydźeń zaso dypkować a z tym zwisk k hornim dźělu tabulki dźeržeć.

Po měrnych spočatnych mjeńšinach mějachu Kulowčenjo prěnju móžnosć hry. Po flance z praweje strony suny Paul Kockert bul do wrotow, ale pobóčny sudnik rozsudźi na nimohru. Po tym so wulki dźěl hry w Kulowskej połojcy wothra. Chrósćenjo móžachu so přeco zaso na křidłach přesadźić. Damian Matik so na lěwej stronje předrě. Jeho flanku Lucas Franz we wrotar hosći wotwobara. Tež druhu třělwu Jana Bogusza wrotar znješkódni. Po nimale poł hodźinje móžachu Chróšćenjo přez wrota wyskać. Po flance Luciana Zahrodnika hłójčkowaše Mato Dźisławk bul do wrotow. Tute wrota dachu domjacym wěstotu a tak sej dalše móžnosće wuhrachu. Druhe wrota pak hakle krótko do połčasa padnjechu. L. Zahrodnik dósta w šěsnatce bul a jón krasnje do hornjeho kuta k 2:0 smokny (39.). Na druhej stronje běchu ofensiwne akcije Kulowčanow rědke.

Do druheho połčasa SJC z dwójnej šansu startowaše. Třělwa Gabriela Zahrodnika pak prasnje na pobóčnu žerdź. Tež Bogusz dalšu dobru móžnosć njewužije. Tola přihladowarjo njetrjebachu dołho na dalše wrota čakać. Dawid Žur wudoby sej w srjedźnym polu bul a pósła G. Zahrodnik. Samy na wrotarja běžo kulowatu kožu w klětce zaměstni (54.). Kulowčenjo móžachu tři mjeńšiny na to skrótšić. Třělwa Bruna Rettiga z kromy šěsnatki bu wotfalšowana padnje k 3:1 do wrotow (57.). Škričku nadźije wza Bogusz hosćom pak hnydom zaso. Po konteru zběhnje Bogusz bul lesćiwje wyše wrotarja a postara so wo štwórte wrota za SJC (60.). Hra bě z tym rozsudźena. Kulowčenjo spytachu dale rezultat hišće raz skrótšić. Tola woprawdźe strašnje před wrotami Jakuba Škody hižo njeběchu. Wo zakónčacy dypk postara so Florian Zelnak. Spěšny nadběhowar docpě po konteru 5:1. Krótko na to sudnik hru k jasnemu dobyću za SJC wothwizda.

Dobyće za SJC bě dospołnje tež we wysokosći zasłužene. Dobry mustwowy wukon pokaza so tež na pjeć wšelakich třělcow wrotow. Na tutym wukonje chcedźa Chróšćenjo přichodnu njedźelu w Ramnowje dale nawjazać. Kulowčenjo maja přichodny tydźeń dalši derby, hdyž přijědu sobotu Ralbičenjo.

SJ Chrósćicy II – SpG Hórnikečanski jězor /­ Kulow II 0:2 (0:0)

Zestawa domjacych: Kola – J.Donat, Cyž (46. Sareng), Młynk, T.Donat, Zahrodnik, Sćapan (59. Šołta), Wornar (46. Hicka), Benš, Dyrlich (84. Mark), Klemenc

Minjeny hrajny dźeń přija SJ Chrósćicy II hrajne zjednoćenstwo Hórnikečanski jězor /­ Kulow II. Po přehraću na Njebjelčicy w minjenym tydźenju chcychu Chróšćenjo reakciju pokazać.

Domjace mustwo namaka spočatnje derje do hry a měješe tež hižo zahe wulku móžnosć k nawjedowanju. Po foulu w jědnacce pokaza sudnik na dypk. Jědnatku pak njemóžeše mustwo we wrotach zaměstnić, bul dźěše nimo lěweho stołpa. Z tym wosta najprjedy při 0:0. Po tym wuwi so wobwojowana hra, w kotrejž wostachu jasne šansy na woboje wrota rědkosć. Chróšćenjo spytachu přeco zaso swojich spěšnych hrajerjow přez hłoboke bule do sceny sadźić, tola přeco zaso móžachu hosćo tute hišće w prawym wokomiku wotwobarać. Krótko do přestawki mějachu hosćo swoju najlěpšu móžnosć. Nadběhowar hosći wotzamkny z něhdźe 18 metrow, bul skoči najprjedy na žerdź a potom do rukow wrotarja. Tak dźěše bjez wrotow do połčasoweje přestawki.

Tež po změnje stronow wosta hra najprjedy wurunana. W 51. min. dóstachu Chrósćicy wólny kop, kotryž pak k přatemu wuspěchej njewjedźeše. Krótko po tym mějachu hosći z Hórnikečanskeho jězora a Kulowa wólny kop, kotryž wjedźeše k prěnim wrotam dnja. Njezbožowne podlěšenje bula wot škitarja Chróšćanow přińdźe direktnje do nohow nadběhowarja, kotryž měješe jara lochke dźěło. Wón suny bul z něhdźe pjeć metrow k 0:1 do wrotow. Chróšćenjo spytachu po tym wurunanje docpěć, wostachu tež derje w hrě, tola w ofensiwje pobrachowaše kreatiwita za wutworjenje dobrych šansow. Hosćićeljo dyrbjachu při tym pak tež někotre strašne situacije přetrać, dokelž dyrbjachu přeco bóle do rizika hić. Pjeć mjeńšin do kónca hry padny rozsud přez dalšu standartowu situaciju. Přez róžk zwyši Hórnikečanski jězor /­ Kulow na 0:2. Z tym bě hra praktisce rozsudźena.

Zjimajo hodźi so rjec, zo mějachu Chróšćenjo bjez dwěla šansy na wrota, tola falowaca rozsudnosć před wrotami a njezbožowne wrota za přećiwnika rozsudźichu hru. Na kóncu wopokaza so Hórnikečanski jězor /­ Kulow II jako efektiwniše mustwo a wza z tym tři dypki sobu domoj.

SC 1911 Wulke Rědorjecy – SJ Chrósćicy (2:0) 3:0

Zestawa SJ Chrósćicy: Škoda, Graf (77.Matik), Dźisławk (81. Bjeńš), Rätze, Cyž, L. Zahrodnik, Bogusz (83. Žur), G. Zahrodnik, Hawš (81. Selnak), Mark, M. Kral-Zahrodnik

Minjenu sobotu běchu koparjo SJ Chrósćic z hosćemi we Wulkich Rědorjecach. Tam wočakowaše jich sylny přećiwnik, zdobom pak sej tež Chróšćenjo po dwěmaj dobytymaj hromaj w lize a jednej w pokalu sebjewědomje nazběrachu. Tak agěrowachu wot spočatka angažowani a spytachu sej prěnje móžnosće zdobyć. Často pak mějachu ćeže so do poslednjeje třećiny hrajnišća předrěć. Na tamnej stronje tež domjacy hišće wjetše šansy njemějachu. Cyłkownje bě hra skerje hišće wot njedokładnosćow při bulu a foulow dominowana. Tajku njedokładnosć zamó mustwo Wulkich Rědorjec wužić. W 17. mjeńšinje zdoby sej Julien Hentsch bul a přesadźi so přez defensiwu Chróšćanow. Zymnokrejnje wón k stawje 1:0 wotzamkny. Po zmylku při natwarje SJC jenož tři mjeńšinow pozdźišo, domjace mustwo wospjet konter startowa. Po niskej flance z praweho boka dósta znowa Hentsch bul před noze a přetwori jón k 2:0. Dwójne přećiwne wrota w tak krótkim času běchu za hosći mały šok a krótko na to Wulke Rědorjecy samo skoro hišće na 3:0 zwyšichu. Třělwa Rica Rudolpha leći pak snadnje nad łatu Chróšćanskich wrotow. Chróšćenjo pak so nětko zaso pomałku zhrabachu a zaso kombinowachu. Ze stawom 2:0 wothwizda sudnik Felix Riffer k połčasej. Po změnje stronow SJC hižo sebjewědomišo wustupowa. Nětko tež defensiwu přećiwnika hišće jasnišo po čisć stajachu. Dobru móžnosć měješe mjez druhim Mato Dźisławk, jeho hłójčkowanje po flance z praweje strony pak wrota snadnje misny. W tutej dobrej fazy buchu Chróšćenjo wospjet šokowani, jako znowa po zmylku w natwarje bul zhubichu. Tutón króć zdoby sej Jonas Steglich bul a wotzamkny zymnokrejnje k stawje 3:0 w 51. mjeńšinje. Najebać hišće wjetšeho zastawka, so SJC dale wo swójske wrota prócowaše. Šansy wot Bogusza, Bjeńša abo Selnaka, pak k wrotam njewjedźechu – naposledk pobrachowachu někotre centimetry abo wrotar Roberto Klotz bul parěrowa. Tak sudnik hru ze stawom 3:0 wothwizda. Je to cyłkownje hladajo zasłuženy rezultat. Přiwšěm pak zawinowa SJC přećiwne wrota přez swójske zmylki, na čimž měli w přichodnych hrach dale dźěłać. Zdobom maja nětko po štyrjoch hraj dwě dobyći a dwě poražce na konće. Přichodnu njedźelu změja doma w Chrósćicach přichodnu móžnosć dypkować. Tam wočakuja přećiwnika DJK Módro-Běłych z Kulowa.

SJ Chrósćicy II – Hlinowc SC 1:5 (0:2)

Zestawa domjacych: M.Mark – Richter, Materne, Kola, T.Donat, Klemens, Hicka, Handrik, J.Donat, Špitank (7. Zarjenk), B.Donat (60. J.Mark)



W prěnim kole wokrjesnjeho pokala trjechi rezerwa SJ Chrósćicy na mustwo z Hlinowca. Chróšćan druhe mustwo je we wokrjesnej lize doma, hosćo hraja we wokrjesnej wyšej lize, z tym je faworitowa rola jasna na boku Hlinowca.

Wot spočatka sem přewzachu Hlinowčenjo kontrolu a mějachu jasnje wjace wobsydstwa bula. Chróšćenjo koncentrowachu so předewšěm na dźěło w defensiwje, to so w prěnim dźělu hry tež derje poradźi, tak zo njedawachu wjele jasnych móžnosćow za hosći. Nažel dyrbjachu Chróšćenjo hižo w sedmej zranjenja dla wuměnić a jenož krótko po tym padny 0:1. Dołhi bul Hlinowčanow staji zakitowarjow Hlinowca před problem, dokelž bě Hlinowski nadběhowar za defensiwu pře spěšny. Nadběhowar běžeše hač na zakładnu liniju a hraješe po tym bul wótrje do centruma tak, zo dyrbješe swój sobuhrajer jenož hišće zasunyć. Hnydom krótko na to zwyšicho hosći na 0:2. Precizna flanka z połpola lěweje strony zleća do šěsnatki a bu wot nadběhowarja hosći wuspěšnje wužita. Tak stwori sej mustwo z Hlinowca hižo w prěnim połčasu solidny wotstawk. Tež hdyž Chróšćan druhe mustwo z dwojimi wrotami wróćo ležachu, pokazachu so dale angažowane. Najlěpšu móžnosć hosćićelow měješe Jan Zarjenk, kotryž so sylnje přećiwo hnydom třom Hlinowskim zakitowarjam přesadźi a bul z poměrnje wótreho kuta na stołp třěli. Nažel tuta šansa žadyn wuspěch njepřinjese, tak zo dźěše z 0:2 do přestawki.

Po změnje stronow činjachu Hlinowčenjo dale ćišć a pokaza swoju indiwidualnu klasu. Při nadběhu z połlěweje strony ćehnješe hóstny hrajer do srjedźa a wobhladanja hódnje wotzamkny. Bul zleća perfektnje do dołheho kuta k 0:3. Chróšćenjo pak so njepodachu a sadźachu dale swójske akcenty. Znowa bě to Zarjenk, kiž móžeše so přećiwo wjacorym přećiwnym hrajerjam přesadźić. Tutón raz zwrěšći na wrotarju. Druhi bul přizemi pola Franca Richtera, kiž bul k Syman-Janej Klemensej dale hraješe. Dokelž bě wrotar přez swoje zašłe zasadźenje hižo wrota wopusćił, móžeše Klemens bul do prózdnych wrotow třělić a na 1:3 skrótšić. Po tym pak bu za Chróšćanow hra hišće raz ćeša. Po žołto-čerwjenej karće Roberta Materny dyrbjachu hosćićeljo poslednje něhdźe 25 mjeńšin w podličbje hrać. Hlinowčenjo wužichu nadličbu a dóńdźechu po róžku k přichodnym wrotam. Wotedaće bu z hłowu do dołheho róžka podlěšene, tak zo hrajny staw zaso na 1:4 rosćeše. Kónčny dypk sadźichu hosćo z preciznej a wótrej třělwu z něhdźe 17 metrow do krótkeho róžka a njedachu znowa wrotarjej Matejej Markej šansu.

Z tym přesadźi so wokrjesny wyši ligist z 5:1 a zaćehnje kaž wočakowane do přichodneho pokalneho koła. Druhe mustwo SJ Chrósćicy pokaza najebać jasnej

poražce předewšěm defensiwnje přez daloke čary angažowany wukon a zdobom móžeše so tež ofensiwnje přeco zaso wo strašne situacije starać.

SJ Chrósćicy – ST Traktor Malešecy (0:1) 0:3

Zestawa SJ Chrósćicy: Škoda, Graf (63. Šiman), Rätze (46.Matik), Cyž, L. Zahrodnik, Bogusz (63. G. Zahrodnik), Žur (65. Donat), Hawš, Mark, M. Kral-Zahrodnik, Handrik (76.Matik)

Minjenu njedźelu wočakowachu koparjo SJ Chrósćic doma přećiwnika ST Traktor Malešec, kotřiž běchu lětsa do wokrjesneje wyšeje ligi postupili a sej hižo štyri dypki zdobyli. Hru z něhdźe 200 přihladowarjemi spyta mustwo SJC wot spočatka sem dominować. Tak mějachu jasnje přewahu buloweje kontrole, zdobom so tež prócowachu zahe doprědka kombinować. Přewažnje pak tu hišće husto hdy falowaceje koncentrowanosće dla so wšitke akcije do kónca njeradźachu. W 22. mjeńšinje dóńdźe bul Clemensa Handrika přez Jana Bogusza k Alwinej Grafej. Tutón sej bul nimo wrotarja połoži a suny bul do wrotow. Z tym zaruči nawjedowanje domjacych. Tež Clemens Handrik měješe po přihrawce Luciana Zahrodnika dobru móžnosć staw zwyšić, jeho bul leći pak snadnje přez wrota. Zdobom běše to najlěpša faza Chróšćanow, dalše wrota jim pak so před přestawku njeradźachu. Tak sudnik ze stawom 1:0 k połčasej wothwizda.

Po změnje stronow spytachu domjacy bul měrnišo a zaměrnišo kontrolować. W 51. mjeńšinje móžachu zaso wyskać. Wospjet bě so Graf wo wrota postarał. Tutón króć wotzamkny wón sylnje z distancy a sadźi bul pod łatu. Nětko hižo hrajachu Chróšćenjo wěsćiši a zdobom sebjewědomišo wustupowachu. Tež Malešenjo spytachu ofensiwne akcenty sadźić, tola Chróšćan defensiwa běše suwerenje bule wotwobarała a akcije přetorhnyła. Na tamnym boku postara so Bosćan Donat w 74. mjeńšinje wo trěće wrota dnja. Wón bě krótko do toho do hry zaměnjeny a wuži flanku Luciana Zahrodnika z praweje strony zymnokrejnje, w tym zo bul přiwza a jón nisko do praweho róžka suny. Tež wuběrny wólny kop z distancy Gabriela Zahrodnika so strašnje wrotam přećiwnika bližeše, pak na kóncu snadnje pódla žerdki leći. Malešenjo agěrowachu zdobom ofensiwnišo a stajichu defensiwu SJC nětko sylnišo pod čisć. Tak nuzowachu jich k zmylkam a jedyn z tutych tež wužiwachu. W 80. mjeńšinje sadźi Christian Noack bul nad wrotarjom Jakubom Škodu do saka. Naposledk pak zamó domjace mustwo nawjedowanje hač k wothwizdanju zakitować. Z tym zawěsćichu sej Chróšćenjo šěsty dypk w třećej hrě. Přichodnu sobotu nastupja tući w pokalowej hrě we Wjazońcy (Neukirch), pola tamnišeho TSV 90.

SJ Chrósćicy II – Radwor 1:0 (0:0)

Zestawa domjacych: Cyž – Wićaz, Materne, Kola, Donat (86. Klemens), Selnak (79. J. Donat), Młynk, Wornar, Bensch, B. Donat (46. Zahrodnik), Dyrlich (63. Špitank)

Zestawa hosći: Šěrak - Bišof, Adam, Wencl (73. Dźisławk), Wowčer (89. Aldeen), Mička, Wenka, Busch (46. Elsner), Glücklich (83. Nuk), Grubert, Wjesela (60. Petschak)

Na třećim hrajnym dnju sezony wokrjesneje ligi steješe za druhe mustwo SJ Chrósćicy Serbski derby na programje. Chróšćenjo witachu njedźelu připołdnju mustwo z Radworja.

Hra započina so wot spočatka sem wurunana z tróšku wjac podźělemi z bulom za hosći z Radworja. Předewšěm w centrumje běchu Radworčenjo husto při bulu. Hosćo hrajachu stajnje zaso płone bule na křidła, kotrež tak přeco zaso na zakładnu liniju dóndźechu. Wot tam nastachu přez wótre přihrawki do šěsnatki strašne situacije. Situacije běchu drje strašne, tola Chróšćan defensiwa tute stajnje hišće w prawym wokomiku wujasni. Chróšćenjo dźěłachu skerje z dołhimi bulemi na spěšne křidła, kotrež mějachu tak přeco zaso jedyn přećiwo jedyn situacije na defensiwnych muži z Radworja. Tola tež Chróšćanam so wrota njeporadźichu. Generelnje bě derby wot spočatka sem wot wjele horcych dwubojow charakterizowany. Hižo zahe wuda sudnik prěnju žołtu kartu, k tomu přińdźechu mnoho foulow a intensiwne dwuboje. Typiske derbyjowe začuće bě tuž wot prěnjeje mjeńšiny pytnyć. Jasne šansy na wrota wostachu na woběmaj bokomaj rědke, tak zo rozžohnowaštej so mustwje z 0:0 do połčasoweje přestawki.

Po změnje stronow zwyši Radwor ćišć a měješe hišće wjace wobsydstwa bula. Hosćo spytachu, Chróšćenjow dale dozady tłóčić a přez wonkowne čary k wuspěchej dóńć. Hosćićeljo pokazachu pak so defensiwnje ze swojeje najlěpšeje strony. Přez kompaktne nastajenje mustwa buchu nadběhi Radworčanow konsekwentnje zakitowane a mnohe bule sčasom wotpopadnjene. Jednu z lěpšich móžnosćow měješe Radwor po flance ze zakładneje linije. Nadběhowar přińdźe z něhdźe dźesać metrow k wotzamknjenju, njemóžeše pak dosć ćišća za bul přinjesć. Chróšćan wrotar Cyž sylnje reagowaše a tak móžnemu nawjedowanju hosći zadźěwa. Chróšćenjo pak so po času tež zaso aktiwniši pokazachu a tak nastachu tež přeco zaso dobyća bula, kotrež k zdźěla strašnym situacijam wjedźechu. Jako hižo wjele na bjezwrotowy njerozsudny wuslědk pokaza, suny Franciskus Wornar po dobytym bulu z něhdźe 18 metrow bul wótrje a płonje do lěhweho dołheho róžka. Radworski wrotar bě bjez šansy a z tym postara so Wornar w 92. mjenšinje wo rozsud. W zbywacych mjeńšinach Chróšćenjo nawjedowanje zakitowachu a tak derby za sebje rozsudźichu.

SJ Chrósćicy II – Radwor 1:0 (0:0)

Zestawa domjacych: Cyž – Wićaz, Materne, Kola, Donat (86. Klemens), Selnak (79. J. Donat), Młynk, Wornar, Bensch, B. Donat (46. Zahrodnik), Dyrlich (63. Špitank)

Zestawa hosći: Šěrak - Bišof, Adam, Wencl (73. Dźisławk), Wowčer (89. Aldeen), Mička, Wenka, Busch (46. Elsner), Glücklich (83. Nuk), Grubert, Wjesela (60. Petschak)

Na třećim hrajnym dnju sezony wokrjesneje ligi steješe za druhe mustwo SJ Chrósćicy Serbski derby na programje. Chróšćenjo witachu njedźelu připołdnju mustwo z Radworja.

Hra započina so wot spočatka sem wurunana z tróšku wjac podźělemi z bulom za hosći z Radworja. Předewšěm w centrumje běchu Radworčenjo husto při bulu. Hosćo hrajachu stajnje zaso płone bule na křidła, kotrež tak přeco zaso na zakładnu liniju dóndźechu. Wot tam nastachu přez wótre přihrawki do šěsnatki strašne situacije. Situacije běchu drje strašne, tola Chróšćan defensiwa tute stajnje hišće w prawym wokomiku wujasni. Chróšćenjo dźěłachu skerje z dołhimi bulemi na spěšne křidła, kotrež mějachu tak přeco zaso jedyn přećiwo jedyn situacije na defensiwnych muži z Radworja. Tola tež Chróšćanam so wrota njeporadźichu. Generelnje bě derby wot spočatka sem wot wjele horcych dwubojow charakterizowany. Hižo zahe wuda sudnik prěnju žołtu kartu, k tomu přińdźechu mnoho foulow a intensiwne dwuboje. Typiske derbyjowe začuće bě tuž wot prěnjeje mjeńšiny pytnyć. Jasne šansy na wrota wostachu na woběmaj bokomaj rědke, tak zo rozžohnowaštej so mustwje z 0:0 do połčasoweje přestawki.

Po změnje stronow zwyši Radwor ćišć a měješe hišće wjace wobsydstwa bula. Hosćo spytachu, Chróšćenjow dale dozady tłóčić a přez wonkowne čary k wuspěchej dóńć. Hosćićeljo pokazachu pak so defensiwnje ze swojeje najlěpšeje strony. Přez kompaktne nastajenje mustwa buchu nadběhi Radworčanow konsekwentnje zakitowane a mnohe bule sčasom wotpopadnjene. Jednu z lěpšich móžnosćow měješe Radwor po flance ze zakładneje linije. Nadběhowar přińdźe z něhdźe dźesać metrow k wotzamknjenju, njemóžeše pak dosć ćišća za bul přinjesć. Chróšćan wrotar Cyž sylnje reagowaše a tak móžnemu nawjedowanju hosći zadźěwa. Chróšćenjo pak so po času tež zaso aktiwniši pokazachu a tak nastachu tež přeco zaso dobyća bula, kotrež k zdźěla strašnym situacijam wjedźechu. Jako hižo wjele na bjezwrotowy njerozsudny wuslědk pokaza, suny Franciskus Wornar po dobytym bulu z něhdźe 18 metrow bul wótrje a płonje do lěhweho dołheho róžka. Radworski wrotar bě bjez šansy a z tym postara so Wornar w 92. mjenšinje wo rozsud. W zbywacych mjeńšinach Chróšćenjo nawjedowanje zakitowachu a tak derby za sebje rozsudźichu.

Hnašecy/­Dobruša – SJ Chrósćicy 1:2 (0:1)

Zestawa SJC: M. Cyž – Rätze, B. Cyž, Kral-Zahrodnik, Mark, Donat (72. Bjeńš), Hawš, Žur, L. Zahrodnik, Bogusz (90. Wićaz), Graf (70. Wornar)

Sobotu běchu Chróšćenjo z hosćom pola lońšeho mištra w Dobruši. Runja SJC běchu tež domjaci z poražku do noweje hrajneje doby startowali.

Chróšćenjo spytachu wot spočatka domjacych wysoko nadběhować a sej tak bul zdobyć. To so jim derje poradźi a tak sej tež hnydom prěnje móžnosće wuhrachu. Tola třělwy Jana Bogusza abo Oskara Hawša njestajichu wrotarja před wulke problemy. W 22. min zdobudźe sej Alwin Graf bul wot wrotarja w šěsnatce a jón k 0:1 do wrotow třěli. Po tym mějachu hosćo dale kontrolu nad hru. Móžnosće pak mějachu husto hdy jenož z distancy. Wótru Třělwu Dawida Žura z kromy šěsnatki wrotar wurjadnje wujasni. Po rjanej akciji přez lěwe křidło so tež Hnašečenjo před wrotami Mateja Cyža přizjewichu. Třělwu z kromy šěsnatki pak móžeše k róžkej wotwobarać. Tež dalšu lesćiwu třělwu Cyž wyše wrota wotwobara. Do połčasa ležeše bul druhi raz we wrotach domjacych. Tola pobóčny sudnik rozsudźi na nimohru. Tak dźěchu Chróšćenjo z snadnym wotstawk do přestawki.

Po połčasu domjaci čisć powyšichu. Tola Chróšćenjo móžachu w 65. min druhe wrota docpěć. Flanku Klemensa Marka z praweje strony Jan Bogusz w šěsnatce přiwza a bul k 0:2 do wrotow smokny. Po tym wotmě so wotewrjena hra. Hnašečenjo tłóčachu na wrota SJC a z tym so jim rumy skićachu. Cyłu kopicu móžnosćow sej hosćo wuhrachu. Tute pak njewužichu. Tola domjaci njedachu so z poražku spokojeni. Woni mějachu dobru móžnosć po wólnym kopje krótko do šěsnatki. Tuta pak prasnje na łatu. W 73. min domjaci skrótšichu. Wonkowny hrajer so na zakładnu liniju přesadźi. Nisku přihrawku před wrota Ronny Kebschull k 1:2 do wrotow suny. Dalše móžnosće škitarjo SJC wujasnichu. Na druhej mějachu Chróšćenjo móžnosć hru rozsudźić. Po přihrawce Luciana Zahrodnika zapasnje třělwa Bogusza dwójce wrota. Tež w dalšej akciji wrotar domjacych z dwójnej paradu swój cyłk w hrě dźeržeše. Krótko do kónca napjatej hry rozsudźi sudnik na wólny kop w dobrej poziciji za Hnašečanow. Tutón pak wrota misny. Po tym sudnik k dobyću za SJC wothwizda.

Prěnje tři dypki maja Chróšćenjo nětko wěste, tola by-li před wrotami tu abo tamnu móžnosć wužili, móhli hru dočasnje a snadź tež jasnišo rozsudźić.

Přichodny tydźeń wočakuja na domjacym trawniku koparjow z Malešec.

ST Kinspórk/­Łužnica - SJ Chrósćicy II 5:1 (2:0)

Zestawa hosći: Mark - Matik, Materne, Kola, T. Donat (80. Zahrodnik), Bjeńš (, Młynk, Sćapan (60. Hicka), Klemenc (75. Zarjenk), B. Donat (70. Richter), Dyrlich (60. Špitank)

Za prěnju hru zwonka Chrósćic poda so rezerwa sportoweje jednotki z Horjan do Łužnicy. Tam powita jich cyłk z Kinspórka a Łužnicy k druhej hrě noweje hrajneje doby we wokrjesnej lize.

Spočatk do hry bě njeposrědny. Bjez wulkeje zaběženskej fazy přewzachu domjacy kontrolu na trawniku. Stajnje zaso podachu so z bulom směr šěsnatki Chróšćanow. Hosćo sami spytachu tež ze spěšnymi přihrawkami so do ofensiwy wuhrać. Tola přewjele njedokładnosće při přihrawkach wjedźechu tomu, zo zwostachu fazy Chróšćanow z bulom krótke. Jedna tajka njedókładnosć wjedźeše k prěnim wrotam hry. Při natwarje chcyše srjedźny hrajer bul sobuhrajerjej přihłójčkować. Tola tuta přihrawka bě do běha přećiwanika, kiž na to z kulu do šěsnatki dóńdźe a tam zymnokrejnje nimo wrotarja Mateja Marka suny. Tak docpěchu Łužničenjo w 19. mjeńšinje nawjedowanje. Domjace mustwo sej tak hišće wjac wěstoty zdoby. Tola tež, hdyž do stajnje zaso šěsnacce Chróšćanow bližachu, so zwjetša tam jich ofensiwne pospyte zakónčichu, pak z třělwu, kotraž pak wrota misny, pak z nohu hóstneho hrajerja, kotryž bul wotwobara. Tež Chróšćenjo mějachu w prěnim połčasu někotre ofensiwne posypte. Tute redukowachu so pak na skerje njestrašne standardy. Krótko do połčasa domjacy na 2:0 zwyšichu. Łužničan dóńdźe z hrajnym nastrojom do šěsnatki. Połoži sej jón nimo přećiwnika a z lěweje strony šěsnatki wotzamkny. Třělwu pak škitar Chróšćanow hišće lochce z hłójčku wotwjedźe, tak zo so čara bula za Marka njedźeržujomne změni a kula do saka trěchi.

Lěpši start do druheho połčasa mějachu znowa Łužničenjo. Wonkowny škitar Chróšćanow zhubi přejedonrje bul na přećiwnika. Tutón smaleše na prawej stronje hač na zakładnu liniju a hrajny nastroj wot tam před wrota hraješe. Tam přichwata nadběhowar domjacych a kožanu kulu do saka wrotow stłóči. Tak domjaci hižo w třećej mjeńšinje po znowazahwizdanju na 3:0 zwyšichu. Po něčim pak so hra bóle wuruna. Łužničenjo hižo telko njeinwestowachu a Chróšćenjo buchu zmužići. Wosebje přez spěšnich hrajerjow wuhrachu sej prěnje jasniše móžnosće. Tak tłochny Franc Bjeńš po dołhej přihrawce na njeho swojemu přećiwnikej a z hrajnym nastrojom do šěsnatki přećiwnika dóńdźe. Jeho třělwa pak bě přecentralna, tak zo ju wrotar wotwobara. W 73. mjeńšinje pak skónčnje Chróšcenjo wrota docpěchu. Znowa dóńdźe wysoka přihrawka na Bjeńša. Tutón ju na Damiana Matika podlěši. Łazkowčan bě spěšniši hač přećiwnicy a dóńdźe tak z bulom do šěsnatki. Tam swobodnje wotzamkny a bul wótrje z lěweje strony do praweho róžka smokny. Na to Chróšćenjo hišće raz spytachu wrota hru změnić. Łužničanam pak skičachu so tak rumy w ofensiwje. Tak tež woni we 83. mjeńšinje z dołhej přihrawku agěrowachu. Z tutej dóńdźe wonkowny hrajer směr šěsnatki Chróšćanow a skakacy bul do dołheho kuta smokny a tak na 4:1 zwyši. Mjeńšinu do kónca domjacy hišće raz juskachu. Při nadběhu dósta srjedźny hrajer Łužničanow bul něšto metrow před šěsnatku přihraty, sej jón hišće raz połoži a wotzamkny. Třělwu drje Mark z ruku hišće docpě, tola njezamó ju dosć wotwobarać a ju tak jenož na nutřkownu žerdź wotwjedźe. Wot tam kula do saka padnje.

Z tym domjacy hru z 5:1 jasnje a zasłužene dobychu. Přichodnu njedźelu steji za Chróšćanow prěni serbski derby na programje. To dojědźe sej k nim mustwo z Radworja.

SJ Chrósćicy – DJK Sokoł Ralbicy Hórki (0:0) 0:3

Zestawa SJ Chrósćicy:
Škoda, Graf, L. Zahrodnik (78. Wornar), G. Zahrodnik, Matik, Bogusz, Donat(65. Wićaz), Šiman (46.Bjeńš), Hawš, Mark, Kral-Zahrodnik

Zestawa Sokoł-Ralbicy Hórki:
Schöne, B. Heidorn, Frencel, R. Šnajder, Wałda, L. Heidorn, Woko, Šewc, Hicka, N. Šnajder, P. Šołta

Minjeny pjatk bu mjeztym 17 sezona wokrjesneje wyšeje ligi zapadołužiskeho zwjazka w Chrósćicach zahajena a to ze serbskim derbyjom w kotrymž nastupichu hrajerjo SJ Chrósćic přećiwo mustwje DJK Sokoł-Ralbicy Hórki. Do hrě bě kapitan SJC – Oskar Hawš – za swoju 100. hru za prěnje mustwo počesćeny. Hra, ke kotrejž přichwatachu něhdźe 460 hosći započina so z wysokim tempom a tu abo tamnymi spěšnymi konterami. Wosebje SJC z nowym trenarjom Waldemarom Adamowiczom zamó runje w prěnjej fazy hry čisć na přećiwnika wukonjeć. Tak měješe Gabriel Zahrodnik dwójce dobru móžnosć staw na 1:0 zwyšić. Jónu jeho třělwa po dobrej kombinaciji Alwina Grafa a Luciana Zahrodnika wrota jenož snadnje misnje, tamny raz bě wótru třělwu z distancy wrotar Willi Schöne hišće přez wrota wjesć móhł. Zdobom spytachu Chróšćenjo so přez strony wrotam bližić, naposledk pak falowa potom w poslednjej třećinje dokładnosć. Wjetšina hry wothra so w srjedźnym polu hrajnišća, na woběmaj stronomaj bě so tempo hry druhdy přez techniske zmylki přetorhnył. Tež Ralbičenjo zwažichu sej nětko sylnišo doprědka. Mjez druhim pruwoła Leonard Heidorn wrotarja Jakuba Škodu, tutón pak sylnje parěrowa. Zdobom so pak flanki do jědnatki so wot nadběhowarjow do strašnišich akcijow njepřetworichu abo kontery so wot Chróšćanskeje defensiwy hišće wotwobarachu. Zdobom stejachu tež Ralbičenjo zady kompaktnje a móžachu Chróšćanske akcije přetorhnyć. Tomu wotpowědujo so mustwje ze stawom 0:0 do předrasćernjow podaštej.

Po změnje stronow běše wobraz spočatnje podobny kaž w prěnjej połojcy, Ralbičenjo pak sej nětko hižo wjace doprědka zwažichu. W 65. mjeńšinje pak radźachu so prěnje wrota dnja. Na lěwej stronje so Livius Frencel přesadźi a na Niklasa Schneidera wotpołoži. Tutón bul bjez ćežow do wrotow suny. Chróšćenjo njedachu so pak wot zastawka wottrašić. Mjez druhim mějachu přez Hawša a Franc Bjeńša dobrej składnosći k wurunanju, tola wrota so jim njeradźachu. Na tamnym boku juskachu hosćo k druhemu razej. Třělwu Richarda Šnajerda wrotar Jakub Škoda hišće sylnje wotwobara a w slědowacej akciji pokaza sudnik po pozdatnym foulu na dypk. Tutón Alexander Wałda bjez ćežow we wrotach zaměstni. Hišće krótko do kónca hosćo staw na 0:3 zwyšichu. Tutón króć suny Richard Šnajder bul po spěšnym konteru do saka. Z tutym stawom sudnik krótko po tym hru wothwizda.

SJ Chrósćicy II – Łuty 1:1 (0:0)

Mark- T.Donat, Kola, Materne, Rätze, Klemens, Dźisławk, Handrik, Zahrodnik, Dyrlich (61. Špitank), B.Donat (85. Sćapan)

Po poměrnje słabym přihoće ze žanej dobytej testowej hru startowaše SJ Chrósćicy II minjeny kónc tydźenja do noweje sezony wokrjesneje ligi. K zazběhej čakaše z Łutami njepřijomny přećiwnik, kotryž docpě zašłu sezonu sedme městno w tabulce.

Chrósćicy přińdźechu spočatnje derje do hry a mějachu w prěnjej poł hodźinje wjele měra při bulu. Clemens Handrik a Mato Dźisławk postaraštaj so w centralnym srjedźnym polu wo dobru stabilitu a zmóžništaj hosćićelam, hru derje kontrolować. Tež šansy na wrota tak nastachu. Bosćan Donat spyta na přikład z třělwu daloko před wrotami, kotraž pak bě tróšku pře wysoka. Handrik třěli z połlěweje pozicije w šěsnatce płonje, bul trjechi pak jenož nutřkowny stołp a skoči po tym do rukow Łutowskeho wrotarja. Łućenjo wostachu předewšěm při standardach strašni. Hižo na spočatku hry dźěše hłójčkowany bul po róžku jenož snadnje wyše Chróšćanskich wrotow. W dalšim wotběhu prěnjeho połčasa namakachu hosćo přiběrajcy lěpje do hry a móžachu so předewšěm ze swojimi derje kopnjenymi róžkowymi bulemi a wólnymi kopami wo strach postarać. Wólny kop z něhdźe 25 metrow móžeše wrotar Matej Mark krótko do přestawki sylnje parěrować. Tež Chrósćenjo mějachu dwě jara dobrej šansi po róžkomaj. Přaty wuspěch pak róžkaj njewunjeseštej, dokelž njedósta Dźisławk dosć ćišća za bulom. Bjez wrotow dźěše skónčnje do połčasoweje přestawki.

Po změnje stronow přińdźechu Łućenjo jasnje sylnišo z kabiny a stajachu Chróšćanow přiběrajcy pod ćišć. Hosćićeljo husto bul pod čisćom won třělichu abo hrajerjow Łutow njefairne wot bula dźělichu, tak zo móžachu Łuty časćišo jich sylnosć měrnych bulow wužić. Wrota pak z toho žane njenastachu. Poněčim pak móžachu so Chrósćicy zaso trochu stabilizować a hru wurunanišu wuhotować. W 60. min. slědowaše potom poražka za hosćićelow. Milan Zahrodnik, kotryž bě do toho hižo wjacore razy do dwubojow zaplećeny, widźeše po dalšim foulu žołtu kartu a dyrbješe krótko na to ze žołto-čerwjenej kartu z městna, dokelž hišće hrajerja, kotryž bě so hóršił storći. Tak mějachu Chrósćenjo z jednym hrajerjom mjenje dale hrać. Mustwo so nětko kompaktnišo nastaji a koncentrowaše so předewšěm na to, rumy wuske dźeržeć. Runočasnje łakachu na móžnosće konterow. W 81. min. bu tute łakanje mytowane. Po najprjedy nic optimalnje wuhratym nadběhu móžachu Chrósćicy wólny kop wudobyć. Mato Dźisławk přewza zamołwitosć a třěli bul płonje do lěweho róžka. Murja skoči horje a bul preciznje pod njej do wrotow kuleše – 1:0 za Chrósćicy. Nětko ćisny mustwo z Łutow wšitko doprědka, mjeztym zo spytachu Chrósćicy z wulkim zasadźenjom, nawjedowanje přez čas přinjesć. W 87. min. bu personelna situacija zaso wurunana. Po njesportowej akciji widźeše Łućanski hrajer čerwjenu kartu a dyrbješe tohorunja dočasnje z městna. Při wšěm njeměło za Chrósćicy k dobyću dosahać. W prěnjej mjeńšinje dohryskeho časa

přińdźechu Łućenjo z něhdźe 20 metrow k třělwje. Tuta wza w lěće njewšědnu křiwku a swój směr jasnje změni. Mark bě so hižo do wopačneho kuta pohibował a njemóžeše tuž hižo rozsudnje reagować. Bul zadyri k 1:1 we wrotach.

Krótko po tym bě kónc. Po dołhej fazy z jednym hrajerjom mjenje je dypk za Chrósćicy bjezdwěla drohotny, tež hdyž pózdnje wurunanje hladajo na nawjedowanje hač krótko do kónca boli.

Zestawa SJC: Škoda, L. Zahrodnik, Zynda, G. Zahrodnik, Rätze, Wićaz, Hawš, Młynk, Bogusz, Handrik, Bjeńš
za SJC zasadźeni běchu nimo toho: 14. Žur, 19. Wornar, 46. M. Zahrodnik, 46. Matik, 46. Donat, 46. Šiman, 46. Selnak

Minjenu njedźelu nastupištaj po poměrnje krótkej lětnej přestawce přećiwo sebi mustwje SJ Chrósćicy a sportowe zjednoćenstwo Łaz/­ Běły Chołmc. Přihotowanska hra za nowu sezonu wotmě so w Chrósćicach. Mustwo SJC, kotřiž hraje we wokrjesnej wyšej lize testowa zdobom přećiwo mustwje, kotryž ligu niže za bulom honi. Domjace mustwo chcyše tak tež wot spočatka sem hru dominować a rolu faworita wopodstatnić. To so jim ze dobrymi a spěšnymi konterami radźi. Hižo w třećej mjeńšinje zamó kapitan Oskar Hawš prěnje wrota dnja třělić. Po róžku trjechi Hawš wuběrnje z hłowu do saka. W 10. mjeńšinje Jan Bogusz z wolejowej třělwu staw na 2:0 zwyši. Pječ mjeńšinow pozdźišo běše Bogusz swoje druhe wrota dnja třělił a tak staw 3:0 zawěsćił. Wospjet bě jemu sobuhrajer Gabriel Zahrodnik při tym asistěrował. Chróšćenjo mějachu tu jich najlěpšu fazu, tak tež njetraješe dołho, zo přichodne wrota padnychu. Tutón króć bě znowa Hawš wuspěšny, kotryž zaso bul do wrotow hłójčkowa. Do lisćiny třělcow so tohorunja w prěnjej přestawce Franc Bjeńš – w 39.mjeńšinje a Clemens Handrik – w 42. mjeńšinje zarjadowaštaj. Wobaj běštaj po sylnymaj konteromaj bul zymnokrejnje we wrotach zaměstniłoj. Na tamnej stronje steješe Chróšćan defensiwa přez cyłu hru jara kompaktnje a njepřipušći přećiwnikej tak dobre móžnosće. Ze stawom 6:0 so mustwje do přestawki podaštej.

Po změnje stronow bě wobraz podobny kaž w prěnjej połojcy. Hosćo angažowani skutkowachu, naposledk pak njemóžachu dalšim přećiwnym wrotam zadźěłać. Chróšćenjo, kotřiž běchu nětko wjace króć hrajerjow změnili, běchu dale před wrotami wuspěšni a móžnosć derje wužichu. W 54. a 60. mjeńšinje zamó Bosćan Donat na so skedźbnić, w tym zo bul wuběrnje – jónu z hłójčku a jónu z wótrej třělwu – do wrotow šmórny. Tež nowopřichad Florian Selnak zamó kulu we wrotach zaměstnić. Po tym, zo bě Damian Matik jemu z lěweje strony dobru flanku dał wón zdobom staw w 64. mjeńšinje na 9:0 zwyši. Poslednje wrota dnja docpě Filip Šiman w 75. mjeńšinje. Tutón bul bjez ćežow z hłowu we wrotach zaměstni. Tak sudnik ze stawom 10:0 testowu hru wothwizda. Za hrajerjow SJC běše předewšěm wažne, zaso hrajny rytmus namakać kaž tež někotre hrajne wotběhi a systemy wupruwować. Njedźelu změja potom na Serbskim Supercupje w Njebjelčicach dalši test. Tam nastupja přećiwo mustwomaj z Njebjelčic a z Radworja.

Sportowa Jednotka Chrósćicy změje k nowej sezonje noweho trenarja: 52-lětny Waldemar Adamowicz trenuje přichodnje prěnje mustwo SJC we wokrjesnej wyšej lize.
Adamowicz přinjese nazhonjenja jako hrajer a trenar sobu. Jako hrajer bě mjez druhim pola Kamjeničanskeho FC a pola FSV Wojerecy aktiwny. Jako trenar nawjedowaše wot lěta 2004 dohromady šěsć mustwow, naposledk Hrajne zjednoćenstwo Łaz /­ Běły Chołmc.
Dotalna trenarska dwójka Maksimilian Kral-Zahrodnik a Felix Cyž po sezonje přestanje. Kral-Zahrodnik chce so zaso na hraće koncentrować, Cyž wostanje mustwu dale jako podpěraćel zachowany. Štó budźe ko-trenar prěnjeho mustwa SJC, je hišće wotewrjene.